1Ti 3 | TPZ | STEP | A soe vëh nöß to soe a man rakah, a teß se keh iu teß non a teß sunön va po kum teß varih to vaman ne e Ieesuß, eß to iu non a kiu vih.

1 Timothy 3

A Nap Susunön Va Po Kum Teß Varih To Vaman Ne Ieesuß Se Vatet A Taateß Vih

1 A soe vëh nöß to soe a man rakah, a teß se keh iu teß non a teß sunön va po kum teß varih to vaman ne e Ieesuß, eß to iu non a kiu vih. 2 Ka teß sunön to vovoh non komön o kum, eß se vavatet ro rakah non a taateß totoopin, eß se nat non teß me non ta hat manih pa matëëra napan. Eß se me non a pah köövo ro, ka ihoß me a taateß peß se teß va non manih pa teß to matop non o iu va po sionin, me eß to vavatet non o kokoman vih varoe. Eß, nee to ta ne poë, pareß matop vavih non a ma teß to nö maß pa iuun peß, pareß nat vavih non a taateß va pa vavaasis a ma napan pa taateß ne Sosoenën to iu non. 3 Eß se nat non teß non a teß kakaak, me a teß heheve vëhöß pareß vapus. Ivëhpëhkëk, a teß tö, pareß kamöß, me eß to hikta iu vörep non a moniß. 4 Eß se matop vavih non a kën tom sinan peß, ko vavaasis non a ma koaß peß, kee ta ne poë, ko vavatet vavih ne a ma soe peß. 5 A teß to hikta onöt non a matop vavih a kën tom sinan peß, a teß pamëh se matop vavih vah va non o kum teß varih to vaman ne e Ieesuß, nih? 6 Ivëhkëk, a teß no vaman peß to voon, eß to hikta onöt non a öt a tasun pa teß sunön va po kum teß varih to vaman e Ieesuß, suk eß tomeß koman ovö a non pan, eß a teß vih ko tavus a teß möhmöh. Ke Sosoenën se kiiki poan, ko vateen en peß pa hat vamanih, pa ö neß to kiiki vavoh e susun po oraß hat, ko vateen en peß pa hat. 7 A teß sunön komön o kum varoe se teß me non o ëhnan vih, manih pa napan to teß tavus këh ne o kum. Ivëh, ko upöm teß hikta onöt ne a siröß poë, keß hikta se on non pa kë pe susun po oraß hat.

A Ma Teß Kikiu Po Kum Teß Varih To Vaman Ne E Ieesuß Se Vatet Ne A Taateß Vih

8 Ivëh, keß vatoe e non pa ma teß kikiu va po kum teß varih to vaman e Ieesuß, no a napan se ta ne raoe, ko sosoe varoe ne a ma soe nee to vaman ne. Pare koe a tavus o teß kakaak, keß tavus vamanih pa ma teß öt moniß vörep pa taateß kaveo a meh teß. 9 Ee se teß me ne o kokoman maaka manih po kupu pee, ko öt vavih ne o vaman, pare öt vakis ne a soe man vëh moaan voh ne Sosoenën to vataare a ra. 10 Eöm se punöß momoaan voh pa kiu pee. Kee pah kon poß a kiu vëh a teß kikiu komön o kum, pa ö nöm to hikta taum ta hat to teß non manih pee. 11 Keß vatoe e non pa ma köövo pee, a napan se ta ne raoe. Ee se nat ne teß ne pa taateß vaato vahat suk o meoh upöm. Ka ihoß me a taateß pee se teß va non manih po teß to matop ne o iu va po sionin, ko nonok vatotoopin ne a ma kiu kurus nee to öt ne. 12 A teß kikiu va po kum se me non a pah köövo ro, pareß teß non a teß susun vih to matop vavih non a ma koaß peß, me a kën tom sinan koman peß. 13 A ma teß kikiu to nonok ne a kiu vih komön o kum, a ma ëhnëëre se teß vavih ne, kee hikta se naöp ne pa vatvus o vaman pee manih pe Ieesuß Kristo.

A Pusun In A Taateß Pe Sosoenën, Eß A Tah Apuh Rakah

14 Eöß to iu nö vëhöß e noß nös pa ep ka oah, ivëh, ka kuru nöß to kiun ka nös oah. 15 Ivëh, keöß se keh vapun nös, eën se ep a soe vëh ko nat eom pa taateß vih ne ea se teß va no, ea o pus koaß pe Sosoenën. Ea to teß va no manih po kum teß varih to vaman no e Sosoenën a toßtoß, ko teß va no manih po toon eh in a iuun to sun vakis non, ko vakikis no a soe man. 16 Ea hikta se vonih no a pusun in a taateß pe Sosoenën, eß a tah apuh rakah to vakoaan voh non, ne Sosoenën to vateeraß voh poan, keß teß va non manih,

E Ieesuß Kristo to tavus teß voh,
a Tuvuh Vasioß to vataare voh a ra pan,
e Ieesuß e koaß pe Sosoenën,
ko ankeroß ep in poë.
Ke Sosoenën me peah poan,
keß kon o maaka apuh rakah.
A ma napan va po vaman to nönö vah ne pa vatvus a Soe Vih suk e Ieesuß manih pa napan to hikta teß ne ro Jiuß,
pa ma vöön kurus a ma napan to vaman ne poë.